الثلاثاء، 30 ديسمبر 2008

حاجات كتير

حاجات كتير اوى حصلت الفترة الاخيرة دى
حاجات كتير عايزة اقولها
احداث كتير بتحصل 
البوست ده هكلم فيه عن حاجات كتير
هتبرو ملخص ليا انا عن اللى بيحصل الفترة دى
وعن السنة اللى مش باينة لها اول من اخر دى
وانا اساسا متنرفزة ومدهولة على عينى 
نبتدى  بلصلاة عن النبى كدة
********
اول حاجة هكلم عنها فى البوست دى عن اللى حصل السنة دى او اهم الاحداث
ولما بقول السنة دى
بقصد السنة الهجرية
عشان احنا مسلمين مفروض لما نكلم نكلم عن السنة الهجرية
السنة الميلادى على عينى وراسى
وبسلم عليها كمان
المهم  منتظر الزيدى
بقولك انتا جدع اوى
بتفكرنى بجدعنة المصريين
اللى تقريبا كادت ان تتلاشى
وربنا معاك
 وميحصلكش حاجة زى ماحصل مع غيرك
انتا اخر الرجال المحترمين
ومش هكلم تانى عن الموضوع ده
تانى حاجة بحتفل بلسنة الهجرية الجميلة وهجرةالرسول محمد صلى الله عليه وسلم
وعايزة اقولك يارسولى  سامحنى بجد
سامحنى من كتر ذنوبى
سامحنى وسامح كل اخواتى اننا مش عارفين نبقى صح
او بنحاول نبقى صح
سامحنى على حال المسلمين دلوقتى اللى بيموتو كل
يوم
وانا مسلمة واقفه اتفرج
كفايه كدة لانى مهمة قولت مش هعرف اقول كل اللى انا عيزاه
تالت حاجة انا ليا اصحاب عراقين وفلسطنين اصحابى
انا عارفه انكو بتقرو البوست دلوقتى
انا مقدرتش اكلكمو
مقدرتش اقولك معلشى
لانى مككسوفة ان البلد دى فيها سفارة اسرائليه
مكسوفة ان البيان اللى اتقال
اتقال من هنا من بلدى
عايزة اقولكو صدقونى مش هيا دى مصر
مش هيا دى مصر اللى الكل داير يشتم فيها دلوقتى
لاء
مش هيا دى
مصر شعب مش حكومة
احنا شعب اغلب من الغلب
ابسط حاجة اقولها اننا بنرضى بقللينا بس بنكره الظلم  اوى
مصر اللى يوم  اللى حصل فى غزة الناس نزلت فى الشارع من كتر الغضب
عايزة تعمل اى حاجة
المظاهرات
احنا صدقونى منقدرش نعمل غير كدة
اللى يعمل غير كدة فى البلد دى يروح ورا الشمس
مصر شعب مش حكومة
ومتفكروش اننا راضين عن اللى بيحصل بس احنا مش بادينا غير الكلام
انا اسفه وربنا معاكو
انا قاعدة فى بيتى مدفيه ومبسوطة ولابسة بيجامتى
واخواتى بيموتو فى غزة 
قاعدين فى بيتهم
مستخبين فى بعض خايفن فى اى وقت بيتهم يولع بيهم بأى قنبلة ولا صاروخ
يا عرب
اصحو بقه
هو احنا مش اخوات ولا ايه
اختنا بتموت والاهلى مرميا على الارض
والبيوت اتهدت والمساجدت اتولع فيها
وانتو كل اللى بتعملوه انكو بتعملو مباحثات كل شوية
اتصالات هاتفيه رئيس دولة كذا برئيس دولة تانية
عايزة اقولكو انتو مش حاسين بحاجة
بتتصلو ببعض ليه
اتصلو باللى بيعملو كدة
اعملو حاجة
اى حاجة تقول اننا مسلمين عرب اقويا كفايه بقه بجد كسفتونا
****************************
حاجة اخيرة
عايزة اقولكو انى لسه بمتحن
وبلنسبة للناس الحلوة اللى دخلت دعت عليا وكانت فرحانة اوى انى بمتحن
وقعدو يزغرطو ويرقصو
عايزة اطمنكم
انى موجودة وهاخد بتارى منكم واحد واحد مش هسيب حقى
ويولكم منى
اشهدو على روحكو
عرفاكو واحد واحد
والتاج اللى جالى من طالب ثانوى وبعد كدة ايمى
هرود عليه ان شاء الله بعد البوست ده
وملحوظة متعورة كمان
انا لسة بمتحن  والامتحان اللى فات جاه منيل وشكلكو كدة دعيتو عليا مش دعتولى لذلك محدش يدعيلى تانى
احسن مستقبلى يديع
ربنا يسمحكو
هئ هئ هئ
ملحوظة كويسة انا عارفة ان البوست طويل شوية بس معلشى مرة من نفسى بقه

الثلاثاء، 23 ديسمبر 2008

*انا*مرفوع مؤقتا من الخدمة

اصحابى المدونين  صحباتى المدونات
عايزة اقولكم خبر وحش
عارفه انكو هتزعلو وهتعيطو كمان
عشان
عشان عشان
انا مش هبقى موجودة الفترة اللى جايه باين عليا اخدت قلم فى نفسى
لاء بجد الفترة الل جايه للاسف عندى امتحانتا كتير اوى فى الكليه وزى مانتو عارفين ان دراستى صعبه
مش هقدر انزل بوستات جديدة
مش هقدر ارود على تعليقاتكم
مش هقدر اعلق على مواضيعكم
 والله انا زعلانة بس نعمل ايه الامتاحانات  شر لابد منو
هحرمكو منى
بس هدخل كل شوية اقرا تعليقاتكم الظريفة
اللى بتتحفونى بيها مع ان فى ناس بتنقطى بكلامها
وبلنسبة للتاج الاؤل اللى جالى
من طالب ثانوى
او تفتكر انى هنفض للتاج
بس اخلص من اللى انا فيه
وهرود على التاج
انا قريتو على فكرة ومفهمتش حاجة لانى ثقافتى اسبانى
 وطبعا انا محتاجة لدعواتكم اوى
ادعولى ربنا يوفقنى فى امتحان يوم الحد الجاى بلذات لانى ميح فيه
واى حد زعلتو ولا اتبلطجت  عليه
يسامحنى ورسم الدخول ملغى مؤقتا
 لحد ما اخلص امتاحانت وتدعولى وبعد كدة افرض ضرايب جديدةمصلحة يعنى
 هدخل اقرا كل تعليقاتكم ومواضيعكم
بس سامحونى مش هقدر ارود
هتوحشونى ياولاد الايه
*****************
سلالالام موز بللبن معاه بقسماطة

السبت، 20 ديسمبر 2008

انا مش ناااااااااااااااااااااااافعة

من يومين كدة وانا فى الجامعه مش ورايا حاجة
ولسه بدرى على باقى محاضراتى
قررت انى اروح اجيب اختى من المدرسة
هيا فى 2/3
ابتدائ يعنى
روحت المدرسة وطلعت اختى فى الدور التالت
وان اطالعة لدور التانى سمعت ابلة بتزعق لبنت  عشان معملتش الواجب تقريبا
بتقوليها انتى يابت اطلعيلى هناااااااااااااااااااااا
وبتزعق ولا اكنها فى اسطبل
كان هاين عليها اخوش اهزئها ان ممكن تزهق طفلة من التعليم كلو
******************
ده كلو مش موضوعنا دى حاجة كدة على الهامش ممكن اتكلم فيها بعدين
*************************************
طلعت الفصل عند البت شطة اختى وهيا اسمها شطة
لانها سبب اى حريقه تحصل
لو فيه خناقة  بعون الله تولعها فى ثوانى
مش اختى
المهم
دخلت الفصل مكنش فيه مدرس عندهم
لقيت الفصل عبارة عن مولد او سوق الجمعه
عيال فى اخر الفصل بيقطعو شعر بعد
اختى كانت واقفه فوق الدكة بترقص
وشغاله اللهم صلى
واد باصص من الشباك بيحدف الكراريس
اول لما شافونى
ان ان ااااااااااااااااااااان تشت
حلوة تشت دى
المهم البت اختى شفتنى
شوشو جت شوشو جت
العيال بصولى
افتكرونى الابلة الجديدة
لقيت بقدرة قادر الفصل كلو بقه قدامى
ابلة ابلة انتى هتدينا ايه
وانا اضحك
ومبسوطة عشان افتكرونى الابلة
قولت ارسم عليهم الدور
اة يا حبيبى انا الابلة بتاعه العربى
بس احنا دلوقتى عندنا دين انتى هتشتغلينا
المهم زعقت وقولت كلو يدخل مكانو يلا
لقيت الفصل كلو
طب هيه ههيه هيه
واختى طلعت كملة وصلة الرقص بتاعتها
وواد كدة بيقول لواد صحبو
ابلة مين يا عم
دى اخت البطة شطة
وبعدين هو ده منظر ابلة
وفشلت انى اسيطر على الفصل
وشكلى كدة مش هعرف اشتغل مدرسة ولما هتخرج هقعد فى
البيت احسن
انامش نااااااااااااااااافعه
**************************
وكان يوم منيل يوم مروحت  اجيب اختى
من المدرسة  اللى هيا كانت مدرستى وانا صغيرة
****************واحنا ماشين بقه
بقولها شطة ايه رايك فى الواد اللى ضرب بوش بلجذمة
قالتلى اة شوفتو الواد ده كويس اوى على فكرة
عجبنى
طااااااااااااايب يختى وكمان بتكلمى فى السياسة
بعد شوية
شطة بتقولى
انا هقول لاى حد انك مامتى
مامتك مين ياروح مامتك انتى
انا كدة مش هجوز
خلاص هخليى بابا يجيبلك عريس
واقولو ميضربكيش
ولو ضربك اطلقى منو وروحى بيت امك تانى
انااااااااااااااا بصوت عالى ده كلو فى الشارع
يارررررروح امك اطلق
وهو انا لسه اتنيلت اتجوزت ولا اتخطبت حتى
احييييييييييية من العيال وسنينهم السودا
************************
اخدتها معاايا الكليه
شوشو
شوشو
هيا البت دى لبست البنطلون ده ازاى
لالالا
البت دى شكلها يع اوى
الحقى الواد موقع البنطلون  والكلوت باين
ياشطة اسمو بوكسر
شطة:بوستر اللى بيلزفو بيه
هههههههههههههههه
لاء يا حبيبتى بوكسر
شطة:الحقى ياشوشو البت قاعدة على رجل الواد
انا: عادى يا اوختى اصلو بيفليها
هههههههههههههههههه
وطبعا قالت بلاوى تانية كتير
بس مش قادرة افتكر لان اليوم ده كان مليان طحن
**********************
عايزة اشكر كل الناس الحلوة بجد اللى دخلت قالتلى كلمة حلوة
وقالتلى كل سنة وانا طيبة
وافتكرونى
وقدرونى
بجد بشكركو اوى لان انا ببقه محتاجة احس ان فيه حد فاكرنى
******************************
قرار
كل اللى هيدخل المدونة دى بعد كدة هيدفع رسم
دخول 3جنيه
والمشاريب عليه
اةةةةةةةةةة انا مش فتحاها سبيل
عايزة اطلع الدور الرابع بقه واقب على وش المايه قصدى الدنيا
سلالالالالالاموووووووووووز
مشمشة

الأربعاء، 17 ديسمبر 2008

انا لسة نونو صغنونو

يلا حالا بالا بالا
حيو ابو الفصاد
واك واك
هيكون عيد ميلادوالليله
اسعد الاعياد
واك واك
حيو ابو الفصاد ايه واك واك دى
خلاص كبرت وبقيت نونو
محدش يسال عشان انا مش عارفه
يعنى ايه معنتو الكلام اللى بهرتل بيه ده
نفسى افضل زى مانا متغيرش
نفسى افضل جوايا صغير
بس عقلى كبير
عايزة اعمل حاجات كتير
واحقق حاجات اكبر
*********************
سيبكو من الكلام اللى فوق ده مش انا اللى كتباه
عااااااااااااااااااااااااااااااااااااااااااااااااااااااا
**************************
زمان وانا صغير كنت بحلم ابقى كبير
وطويل واهبل كدة
نياهاهاهاهاهاها
واول ما كبرت
نفسى ارجع تانى صغيرة
ليه بقه
المعنى فى رجل الشعر
قصدى بطنو
زمان :كان بيعملولى عيد ميلاد
زمان :كان بيجيلى هدايا
ولبس جديد
اى والله  كل عيد ميلاد لبس جديد
وهداااااااااااايا يااما
وفلوس
كلو راح
كلو اتكسر كلو ادمر
ولا حد بقه يسال فيا
لو صعبت عليكو كل واحد يسيبلى هدية فى الاخر
وكل واحد وزوقو
وياريت بقه لو ظرف صغير كدة فيه مبلغ من المال
يعينى على احتيجات البيت والعيال
عاااااااااااااااااااااااااااااااااااا
البوست بتاعى وهرغى براحتى
بمناسبة مرور 19 سنة على وفاتى
قصدى انى بقالى 19 سنة عايشة
كل واحد ليه حتة جاتو
وازازة بيبسى
بس مش ليه لوحدو
كل مجموعه تخمس فى ازازة
اة اجبلكو منين يعنى اسرق يعنى
او كل واحد يجيب ازازاة بيبسى معاه وهو جاى المدونة
والهدايا
تكون متغلفه
مش عايزة هدايا  مقالب كفايا اصحابى المقاطيع
كل واحدة بتستظرف اللى جيبالى طقم كوبيات
تقولى عنيه لجهازك
واللى جيبالى كيس شيبسى عشان انا بحبو
والفضيحة  بقه
واحدة جيبالى بامبرز
ليه ياختى
انا لما بحب اعمل بيبى 
بقول لماما وتدخلنى
ياااااااااااااااا البوست طول اوى
وحاسة انى محتفلتش بنفسى كويس
يلا بقه
مستنيا دعمكم المالى
للاتصال للتبرع
987654321
وشكرا  كل سنة وانا طيبة ولسه زى مانا
مشمشة الشقيه

السبت، 13 ديسمبر 2008

خلص خلاص

كنت اتفقت معاكم انى هنزل بوست
عن اللى حصل فى العيد
بس مش عارفة اتكلم فى ايةعشان ااساسا
مفيش حاجة مميزة حصلت 
هكلم عن يوم الوقفة
واللى حصل فيها
اول حاجة طبعا خلصنا الشقة والحمد لله 
بعد ماضهرى اتكسر وماما دخلت نامت وسبتنى 
اعمل كل حاجة لوحدى 
يلا بقه مش مشكلة امى هعمل ايه هرميها مثلا
المهم جه وقت الحمى 
ان ان اااااااااااااااااان تش
ماما:خوشى استحمى يابت 
انا:مش قادرة عايزة انام
ماما:بكرة العيد وكل الناس بتستحمى
انا:ونا استحمى ليه واعمل زى باقى الناس
ماما:اه يابنت ال000000
كل واحد يتخيل هيا شتمت قالت ايه 
المهم بعد مناقشات حادة 
كادت ان يتسخدم فيها ايد المأشة 
ورجل الكرسى 
انا:عيزانى استحمى  هاتى 2 جنية عشان عايزة اجيب شيبسى كبير
ماما:نعم ياروح امك
ان شاء الله عنك ماستحميتى 
خليكى كدة 
طيب خلاص هتدفعى وادخل استحمى 
ماما:هو نص جنية مفيش غيرو وهتغسليلى البوتجاز كمان
طبعا مااما انصح منى 
واستذخمت ذكائها عليا
والحمد لله اليوم ده عدى على خير من غير اى احتياج لقوات الامن 
***********
يوم العيد 
صحيت الصبح صحيت كل العيال جرانى
ونزلنا صلينا
طبعا فى المسجد 
بيوزعو حاجات حلوة للعيال الصغيرة 
وطبعا اخدت نصيبى من الحاجات دى بعد محاولات مع الست انى هاخد يعنى هاخد
بلطجة هيا بقة 
ولميت الحاجات الحلوة من كل العيال اصحابى اللى حواليا 
بد ماخلصنا الصلاة
الجو كان جميل جداا
اتفقت معاهم اننا نتمشى نشوف اى حد هيدبح 
عشان نتفرج 
بس ملقناش
لقيت واحد رابط حمار قدام البيت 
سسالتو  قالى الجزار لسه مجاش
الراجل هيضحى  بحمار
ياحلاوة المولد 
لولولولىىىىىىىىىىىىىى
خلص اول يوم
تانى يوم وتالت يوم
ورابع يوم
كل خروج وزيارات 
************************
اللى عايزة اقولو من الكلام ده كلو 
ان نفسى كل يوم يبقى العيد 
نفسى نفضل نزور بعض كدة  كل فترة مش لازم كل يوم
لو حتى بلتلفون 
 نعمل اى حاجة بس نبقى قريبين من بعض
نفسى ارجع اخد عدية زى زمان
دلوقتى مبقاش حد يسال فيا عشان بقيت كبيرة وهبلة كدة
نفسى منسبش بيتونا لاخر لحظة ونستمتع بلايام الجميلة بلدعاء والصلاة والصوم
نفسى اللى يدخل يعلق علىالبوست ده يسيبلى ربع جنيه 
عشان عايزة اشترى لكلوك جديد على شكل ارنوب
نفسى محدش يتريق على كللامى 
وخلى عندكو شوية دم 
**************************
ملحوظة تخينة 
بشكر قلم رصاص
لانو ساعدنى فى شوية حاجات فى المدونة 
وكمان علمنى ازاى احط ساعه
ايه رايكو حلوة ولا لاء
هيا عجبانى
شكرا بجد تعبتك معايا واستغبيت عليك كتير
سلامووووووووووز
البت مشمشية حلوة بس شقية
******************  

الخميس، 11 ديسمبر 2008

الست ابى هانم

انا حبيت ان اقدملك معايدة بسيطة منى يوم عيد ميلادك
وتكون بداية لمعرفة وصداقة بجد
حبيت اشارك المدونين بخروفة التدوين واحتفل معاهم بست الكل
دورت على تورتة  على شكل خروف ملقتش
عايزة المرةالجاية اقدملك تورتة الجواز
كفايه بقه عليكى لحد كدة وانا من هنا بعلن
انى هبتدى ادورلك على عرييس
واهم شروطك امتلاكو لمزرعة من الخرفان
كل سنة وانتى طيبة يا ابى هانم
اختك مشمشة

الجمعة، 5 ديسمبر 2008

العيد فرحة ماااااااااااااااء




العيد فرحة ياااسلام

واجمل فرحة يااااسلام

غنو معايا غنو


قولو ورايا قولو

بصراحة مش فاكرة بقيت الاغنية

اهو جانا العيد هيييييييييييييه

اهلا اهلا بلعيد مرحب
مرحب بلعيد
المهم
نحكى باختصار اللى حصل معايا انهاردة واللى هيحصل اليومين الجاين ان شاء الله
انهاردة بعد خناق طويل
ماما: اصحى يا بت
انا:الساعه كام
ماما:الساعه 11 ياختى
ماما:قوم عشان نلحق نخلص الصالون
انا:حاضرررريا حجة
انا سبينى بس خمس دقايق
المهم ماما مسبتنيش جبتنى من شعرى على الصالون عدل
ماما:انتى اساسا مش نافعه ومش هتعرفى تفتحى بيت
انا: طيب



ماما: ايه المسح المنيل ده والكلكة دى
مش عارفه تعملى حاجة
انا: خلاص ياماما خودى امسحى انتى
ماما:بنظرة كلها اسى ربنا مايحوجنى ليكى يبنتى



انا :مانتى مش عجبك اللى بعملو اعملى انتى
ماما:نظرة كلها شر نعم ياختى هتعملى وتمسحى غصب عنك
ده ملخص الحوار اللى حصل قبل مامسح
وفى الاخر مسحت الاوضة والبلكونة ونضفتهاوفرشتها
وفى الاخر تقولى انتى مبتعرفيش تعملى حاجة



**********************
بكرة هنمسح اوضتى واوضه مااما
*****************
بعد بكرة الوقفه بقه هيبقى يوم عالمى للتنضيف والخناق
هنخلص الشقه وان شاء الله
وامى هتدخلنى استحمى
مع انى اؤمن انى نضيفه طول عمرى من غير حمى
وهدخل استحمى غصب عنى
مع انى مستحمية من شهر ونص كدة والحكايه زى الفل


اصل الجو سقعه اووووى
**************
اللى بقولو ده
ملخلص للى بيحصل ف اغلب البيوت المصريه
واللى بشوفو قدامى عند جرانى وكل قرايبى
حملات نظافة شاملة
غسل السجاجيد وتنفيضها
الاستحمام الاجبارى
ليه بنسيب الشقق تتن لحد العيد عشان يبقى اجبارى نمسح فى العيد بذمة
ليه مع انها ايام مفترجة وايام صوم
ليه بنسيب كل حاجة لليوم ده طيب اوضه الصالون
مفهوم انها بتتنضف عشان الضيوف فى العيد
طيب اوضنا مالها
ماهى نضيفه وزى الفل
حملات نضافه اللتى تطال الاخضر واليابس
***********
انا اتكلمت بس على النضافه قبل العيد
بعد العيد ان شاء الله هينزل بوست عن اللى حصل فى العيد ان شاء الله
وهيكون فى كرتونة فى اخر المدونة عشان كل اللى يجى يحط حتة لحمة ويلفها فى ورقه جرنان
نصيبى من الخروف
ماااااااااااااااااااااااااااء























الثلاثاء، 2 ديسمبر 2008

اول القصيدة كفر


انا مش هكلم كتير بس هسيبكو انتو اللى تكلمو



عشان انا ماليش نفس بصراحة






وبطنى بتوجعنى وعايزة اكل حوواشى





هسيب الصور تكلم







اة ياموكوس يا ابن الموكوسه شى متوقع منك






اللى كنا فاكرينو موسى طلع ابن تيييييييييييييت

عقبال مانحط الزلط والطوب على قبرك






فرحان اوى بلطاقيه بتاعه بكار اللى انتا لابسها دى








هو ده اللى فاكرينو هيعمل عمايل ويسوى الهوايل



خايفه لظنى يطلع فى محلو وحلو يا حلو



انتا واقف تاخد عزا مين


انتا عايز تعمل زى الناس ولا ايه خدلك جمب لو سمحت

من بوش لباراك اوباما يا قلبى لاتحزن

مش عايز حد بقه يطول لسانو عليا احسن اقطعهولو

ولمو الدور معايا عشان انا من ساعه الصور دة وانا مدايقة

يلا بقه عشان انا هقوم اكل فسيخ ورنجة

ووسعو بقه عشان الريحة واللى يجى يعلق يجيب معاه

بلصتين

ولبان كلورتس من ابو ربع جنيه الحلو ده واللى هيقو

كلمة متعجبنيش هطلع ريحة الفيسخ فى وشو وهقول حاحا سلاموووووز بلبلن عشان

طعمو حلو