السبت، 13 ديسمبر 2008

خلص خلاص

كنت اتفقت معاكم انى هنزل بوست
عن اللى حصل فى العيد
بس مش عارفة اتكلم فى ايةعشان ااساسا
مفيش حاجة مميزة حصلت 
هكلم عن يوم الوقفة
واللى حصل فيها
اول حاجة طبعا خلصنا الشقة والحمد لله 
بعد ماضهرى اتكسر وماما دخلت نامت وسبتنى 
اعمل كل حاجة لوحدى 
يلا بقه مش مشكلة امى هعمل ايه هرميها مثلا
المهم جه وقت الحمى 
ان ان اااااااااااااااااان تش
ماما:خوشى استحمى يابت 
انا:مش قادرة عايزة انام
ماما:بكرة العيد وكل الناس بتستحمى
انا:ونا استحمى ليه واعمل زى باقى الناس
ماما:اه يابنت ال000000
كل واحد يتخيل هيا شتمت قالت ايه 
المهم بعد مناقشات حادة 
كادت ان يتسخدم فيها ايد المأشة 
ورجل الكرسى 
انا:عيزانى استحمى  هاتى 2 جنية عشان عايزة اجيب شيبسى كبير
ماما:نعم ياروح امك
ان شاء الله عنك ماستحميتى 
خليكى كدة 
طيب خلاص هتدفعى وادخل استحمى 
ماما:هو نص جنية مفيش غيرو وهتغسليلى البوتجاز كمان
طبعا مااما انصح منى 
واستذخمت ذكائها عليا
والحمد لله اليوم ده عدى على خير من غير اى احتياج لقوات الامن 
***********
يوم العيد 
صحيت الصبح صحيت كل العيال جرانى
ونزلنا صلينا
طبعا فى المسجد 
بيوزعو حاجات حلوة للعيال الصغيرة 
وطبعا اخدت نصيبى من الحاجات دى بعد محاولات مع الست انى هاخد يعنى هاخد
بلطجة هيا بقة 
ولميت الحاجات الحلوة من كل العيال اصحابى اللى حواليا 
بد ماخلصنا الصلاة
الجو كان جميل جداا
اتفقت معاهم اننا نتمشى نشوف اى حد هيدبح 
عشان نتفرج 
بس ملقناش
لقيت واحد رابط حمار قدام البيت 
سسالتو  قالى الجزار لسه مجاش
الراجل هيضحى  بحمار
ياحلاوة المولد 
لولولولىىىىىىىىىىىىىى
خلص اول يوم
تانى يوم وتالت يوم
ورابع يوم
كل خروج وزيارات 
************************
اللى عايزة اقولو من الكلام ده كلو 
ان نفسى كل يوم يبقى العيد 
نفسى نفضل نزور بعض كدة  كل فترة مش لازم كل يوم
لو حتى بلتلفون 
 نعمل اى حاجة بس نبقى قريبين من بعض
نفسى ارجع اخد عدية زى زمان
دلوقتى مبقاش حد يسال فيا عشان بقيت كبيرة وهبلة كدة
نفسى منسبش بيتونا لاخر لحظة ونستمتع بلايام الجميلة بلدعاء والصلاة والصوم
نفسى اللى يدخل يعلق علىالبوست ده يسيبلى ربع جنيه 
عشان عايزة اشترى لكلوك جديد على شكل ارنوب
نفسى محدش يتريق على كللامى 
وخلى عندكو شوية دم 
**************************
ملحوظة تخينة 
بشكر قلم رصاص
لانو ساعدنى فى شوية حاجات فى المدونة 
وكمان علمنى ازاى احط ساعه
ايه رايكو حلوة ولا لاء
هيا عجبانى
شكرا بجد تعبتك معايا واستغبيت عليك كتير
سلامووووووووووز
البت مشمشية حلوة بس شقية
******************  

هناك 62 تعليقًا:

فارس القمر يقول...

كل سنه وانتى طيبه

وربنا يخليكم لبعض انتى ووالدتك

ومافيش داعلى للبلطجه يعنى وانتى مش

بتيجى الا بالشكلايته ههههههههههه

خدى نص جنيه بلاش ربع جنيه

ولا اقولك مافيش ولا نص ولا ربع بلطجه

بقى

مدونه جميله قوى وزى الثكر

كل سنه وانتى طيبه

فارس القمر يقول...

وبما انى اول تعليق

انتى اللى هتجيبى الشبسى والربع جنيه

كمان (وش احمر )

تحياتى لمدونتك الجميله

Ahmed يقول...

حمدلله على السلامة

انا قلت ان عملية التنضيف مخلصتش قبل العيد عشان كده كملتيها في العيد

على العموم كل سنة وانت طيبة

بس للأسف العيد بعد ماخلص الناس رجعت تاني لبيوتها وكله نسي بعضه

وعادت الأيام ياولدي

بمناسبة الربع جنيه, هو فيه لكلوك بربع جنيه ولا انت عايزه الربع جنيه عشان المصاصة واللبان ومكسوفة تقولي؟!!

البت المشمشية حلوة بس شقية يقول...

فارس القمر

ايه ياعم الدخلة الجامدة دى
هتاخد منى ربع جنية بلطجة
ده انا بشحت
بجد كل مرة المدونة بتنور بوجدك
وكدة هدفع كهربا كتير







Eng. Ahmed Abo El-Ella
بقه كدة بتتريق عليا
لاء ياخوية مش عايزة مصاصة ولا حاجة
انا هلم من كل واحد الربع جنيه واجمع الفلوس واشترى مصاصة
ام قصدى لكلوك

غير معرف يقول...

هههههههههههههههه
والله انتي زي العثل

اهم حاجه ان الخناقه انتهت من غير قوات الامن
ههههههههههههههه

وكوووووووووول عيد وانتي طيبه

وانا هسيبلك 15 قرش بس عشان انا كمان عايزه اشتري لكلوك
:)))

محمد حمدي يقول...

بوست جميل اوى .. وعندك حق فى الى قولتيه
والساعه حلوه يا ستى عقبال البانر

البت المشمشية حلوة بس شقية يقول...

hager za3bal
15 قرش بس يامفترية
اجيب بيهم ايه دول
سيبى ربع جنية وانا اديكى فردة لكلوك بتاعى




Mohamed Hamdy
الحمد لله ان الساعه عجبتك
بس ايه البانر ده؟؟؟؟

قلم رصاص يقول...

هههههههههههههههه

ربنا يخليكي لمصر يامشمشيه
والعفو يابنت الناس
انا معملتش حاجة ده واجب علي تجاه أخت كريمة زيك والله

بس البوست المره هااااااااايل
وساخر جدا جدا ..هههههههههه

ربنا يوفقك
ومنتظرين منك كل ماهو جديد

تقبلي مروري مع ربع جنيه

البت المشمشية حلوة بس شقية يقول...

قلم رصاص
ايه ياعم ده انا كاتبه فيك قصيدة شعر
تقوم تسيبلى ربع جنيه بس
ليه بس تزعلنى منك كدة
بعد كدة اللى يدخل يعلق عندى هيدفع رسم دخول نص جنية
وانتا بلذات هتدفع 2 جنية

دمع الزهر يقول...

السلام عليكم
جميل اوى البوست بتاعك
عجبنى تلقائيتك فى الكلام
وكل سنة وانتى طيبة
ربنا يجعل ايامك كلها اعياد
تقبلى مرورى:)

دمع الزهر يقول...

اه صحيح
نسيت اسيبلك نص جنيه علشان اللكلوك
:D

البت المشمشية حلوة بس شقية يقول...

الشاعرة

الحمد لله ان البوست عجبك وابقى تعالى بقه اديكى عرفتى المكان


وشكرا اوى على النص جنيه هحطو فى لحصالة

غير معرف يقول...

كل سنة وانتي والاسرة بخير

البت المشمشية حلوة بس شقية يقول...

afew good men
وانتا طيب

adel يقول...

هههههه يا مشمش يا جامد

اهم حاجة خدتي نصيبك من الحمار ولا لا
هههههههههه

و حد يستحمي بنص جنية بس

بس بجد توبك كوميدي قوي

و عقبال ماتجيبي اللكلوك

عادل
http://elbald-dy.blogspot.com/

البت المشمشية حلوة بس شقية يقول...

adel
لاء مانا استنيت الجزار اللى هيدبح الحمار مجاش بقه
يارب ياخوية يارب


نورت بجد

قلم رصاص يقول...

ههههههههههههههههههه

احرجتيتي وهتضريني أسيب لك كمان ربع جنيه
بس طالع من .. من .. من

مننننننننننن جيبي !
هههههههههههههههههههههههه

يلا عديني بقى عشان ورايا مشوار وهاجي تاني

ههههههههههه

مع التحيه والمهلبيه

البت المشمشية حلوة بس شقية يقول...

مفيش مهلبيه
دخول المدونة مش زى خروجو
وبعدبن انتا سالف منى 12 جنيه
هات الفلوس اللى عليك احسن هشردك فى المدونات كلهم

Soooo يقول...

كل سنه وانتي طيبه يا مشمشية

والف مبروك على حموم العيد

بس ايه البلطجه اللي انتي فيها دي .. دايره تاخدي العيديه من العيال وعايزه مننا ربع جنيه إتاوة كمان

انا لن اسمح بكده
وهعلن العصيان التدويني عليكي
وهقول لا اربع لمشمشيه
لا بونبوني ولا عيديه


ملحوظه
عايزاني اغير كلامي واعمللك احلى دعايه لحملة الربع جنيه .. شوفيني بسبعه جنيه ونص تصبيره كده





سلامووووووووووووووز

البت المشمشية حلوة بس شقية يقول...

Soooo
الله يبارك فيك عقبال حمومك السنوى انتا كمان
وبطل تريقه عليا

وبعدين انا لو معملتش كدة هكون نفسى ازاى
هطلع ازاى الدور الرابع
واجهز نفسى عشان اروح اخطب

وبعدين اشوفك ازاى بسبعه جنيه
مش تدفه ال29 جنية اللى ادتهوملك الشهر اللى فات انا فلوسى كدة ضايعه على السلف

ANGHAM ALLAM يقول...

ههههههههههههههههه
ماشي يا مشمشه
هسيبلك ربع جنيه
او ممكن اسيبلك 10 قروش واكمل ال 15 قرش بتوع هاجر
وناخد انا وهي فردة اللكلوك
:))

البت المشمشية حلوة بس شقية يقول...

ANGHAM ALLAM
ايه يبنتى المصلحة دى
بريزة تعمل ايه
ده انا مقدرش اديها لعيل صغير بيشحت
فوكى الكيس بقه

عبدالله يقول...

كل سنه و انتي طيبه عيد سعيد بمناسبه الحمي اكيد طبعا

الا ايه اخبار الحمار مش لازم تطمني عليه ادبح ولا لا

انا شايف في تبرعات هنا علشان اللكلوك ماشي مش مشكله هسيب ربع جنيه بس و انا بسيبه هاخد كل التبرعات بقي لولوك ايه في الحر ده :)

تحياتي

مسدس صغير يقول...

ههههههههههههه حلو البرنامج بتاع يوم الوقفه ده عجبنى اوى. غير كده هو قلم رصاص مقلكيش ان انا اللى معلمه يعمل الساعه ازاى؟؟؟ ههههههههههه بتاع ساعات صحيح. اشكرك واشكر حبيب قلبى قلم رصاص على الساعه الجميله دى

البت المشمشية حلوة بس شقية يقول...

عبد الله


مش عارفه والله بس اكيد الحمار توفى يعنى
وبلنسبة للتبرع انتا ليك بص ولا بحلقه ادفع وانتا ساكت وومالكش دعوة بأى فلوس موجودى ومش مدايك اللكلوك بتاعى لفه هههههههه
نورت



مسدس صغير
على فكرة انا كنت فاكرة انك انتا وقلم رصاص شخص واحد

وبعدين انتا جاين تتخانقو هنا ولا ايه
بس الساعه عجبتك
جيباها ب2جنيه ونص
نورتنى ابقى تعالى تانى

مسدس صغير يقول...

بالفعل احنا واحد اصل انا وقلم رصاص مينفعش نبقى اتنين غير كده . هو ازاى يدفعك فى الساعة دى 2 جنيه ونص وهيه عندى بجنيه وربع ايه الربا الفاحش ده ودايما هتلاقينى عندك فى المدونه ان شاء الله تقبلى تحيتى

البت المشمشية حلوة بس شقية يقول...

وانا ايه بقه يعرفنى انو عندك بجنية وربع مش تبقى تقول عموما هرجعهالو واجيب قلوسى منو عشان شكلو بيستكردنى

Dr. Ibrahim يقول...

يالا بقى لازم الوالدة تستريح شوية والبركة فيكى طبعا

يالا كل سنة وانتى طيبة ويعودها عليكى بالخير والسعادة

والساعة حلوة زى الفل

تحياتى

د إبراهيم

مدحت محمد يقول...

كل سنة وانتى طيبة

يام فاروق

البت المشمشية حلوة بس شقية يقول...

Dr Ibrahim samaha
بجد الساعه عاجيتك دفعت فيها دم قلبى
بجد والله نورتنى
واديك عرفت المكان ابقى تعالى تانى
وبلنسبة لماما هيا مش بتعمل حاجة كدة وخلاص تقدر تقول بلطجة يعنى


مدحت محمد
ربنا يخليك ابو اسماعيل
لولولولوللللللللللللللللللللى

فارس القمر يقول...

لالالا
ممنوع البلطجه فى المدونه دى

ارفع ايدك انت وهو اتفضلى ياشقيه

هديتكhttp://www2.0zz0.com/2008/12/14/16/859871631.jpg

حنين القلب يقول...

كل سنه وانتى طيبه
دمك عسسسسسسسسسسسل
امك عندها حق تاخدى 2 جنيه لييييييييييه

عندك ربع جنيه عديتك علشان تجيبى الكلوك


تقبلى مرورى

البت المشمشية حلوة بس شقية يقول...

فارس القمر
ميه ميه بلاش بلطجة عندى ممكن فى مدونة تانيه المهم
ايه الرابط ده مش فهمة منو حاجة

وبعدين حطيتو على النت مفتحش ياريت تفهمنى بدال مانا حمارة كدة ومش فاهمة حاجة






حنين القلب
اخس عليكى يابت
بقه كدة وهو الربع جنيه بيجيب ايه
ده انا بجرى على خمس عيال وابوهم
بس بقه قلبتى عليا المواجع
اهى اهى اهى

اةةةةةةةةةةةة يانا يا غلبانة يابابا
تبرع ولو بجنيه

فارس القمر يقول...

الرابط دا

كان رابط


100 دولار

بدل الجنيه وربع اللى بتتبلطجى بيها

هههههههههههههههههههههه

البت المشمشية حلوة بس شقية يقول...

فارس القمر
امممممممممممممممم
بردو مفهمتش حاجة

رئيس التحرير يقول...

الموضوع جميل ...
بجد دمك خفيف خالص ...
اخف من دم جهاد بنت!
شلتي حروف التأكيد من عندك ...جبتيها عندي
والله حرام عليكي....

البت المشمشية حلوة بس شقية يقول...

رئيس التحرير
بجد نورتنى ومتحرمنيش من ردودك الحلوة دى
وبعدين بلنسبة لحروف التاكيد انا اتعلمت لو عايز تعرف تشيلها ازاى انا ممكن اقولك بس بفلوس كلو بتمنو
هههههههههه

انسانةعادية فى عالم مش عادى يقول...

يخرب عقلك يامجنونة على فكرة صعبتى عليا اوى اوى خالص مالص علشان كده هجابلك الكلوك وامرى الى الله انا عارفة فى الشتاء بئا الرجل تقشف وتكسفينا ههههههههههه

البت المشمشية حلوة بس شقية يقول...

انسانةعادية فى عالم مش عادى
الهى يارب مايقشفلك رجلك
ولايسقعلك ايد وتفضلى طول الشتا دفيانة كدة


نورتى بجد
على فكرة انتى من الناس اللى انا بحبهم

blue-wave يقول...

ههههههههههههههههههههههههههه
بجد فطست على روحى من الضحك
والله انتى تحفه

marmar يقول...

ههههههههههههههههههههههههههههههههه ايه كمية اللماضة الي فيكي دي
هههههههههههههههههههههههههههههه
احسن علاج لوالدتك في ترميها طبعا
لا بينفعوا صدقيني
كبريلها الجي وروقيلها الدي
ومفيش مني ربع جنيه
وايييييييييييييييييييييييه


كده بقينا شعبولا اوي

الدرويش المرووش يقول...

كل سنه و إنتى بألف خير

و السنه اللى جايه تبقى فى تانيه تالت

مافيش حاجه بعيده على ربنا

;o)

حروف يقول...

ايون جميلة الساعة اوي مبروك عليكي ههههههه
علي فكرة لو كنتي ناصحة كنتي قوللها حجيب شامبوا او صابونة وكنت عطيتك ههههه
بقوللك انا اتلخبطت هو مسدس صغير هوهو قلم رصاص ولا ايه يعني انا اكلم مين دلوقتي ههههههه

البت المشمشية حلوة بس شقية يقول...

blue-wave

اى خدمة ياعم ضحكتك ببلاش اهو

البت المشمشية حلوة بس شقية يقول...

marmar
ايه يبنتى انتى جاية تولعى الدنيا
حاضر ياستى هكبرلها الجى وروقلها الدى

وايه البلطجة دى هتدفعى يعنى هتدفعى

البت المشمشية حلوة بس شقية يقول...

الدرويش المرووش
تانيه تالت
ابتدائى دى ولا ايه
انا كبرت وبروح الكليه وانتا لاءءء
هههههههه
نورتنى

البت المشمشية حلوة بس شقية يقول...

حروف (دلو مرة ثانية وجرح ثاني سابقا
هههههههههه
يادى النيلة لاء مانا كنت فاكرة انهم شخص واحد
بس طلعو اربعه
هههههههههههه
لاء هما شخصيتين بس اصحاب ربنا يديم المعروف
وفين الربع جنيه
نورتى

amnesia يقول...

كل سنه وانتى طيبه

ياريت فعلا تبقى كل الايام عيد

والعديه والله تصدقى انا نسيتها

واحنا صغيرين كان مفيش عيد الا بالعيديه

يلا يا مشمشيه احنا الوقتى اللى بندى العيديه.. ده المفروض يعنى ههههههه

البت المشمشية حلوة بس شقية يقول...

mnesia
وانتى طيبة ياقمر
لاي اختى انا مش بدى حد حاجة انا اخد وبس

اقصوصه يقول...

تدوينه جميله

تقبلي مروري من هنا

تمنياتي بالتوفيق )

البت المشمشية حلوة بس شقية يقول...

اقصوصة
نورتى

الرومـيصاء يقول...

ياخبر ابيض يامشمشه

كل الحوارات دى علشان تستحمى

انصحك كل مره ترفضى انك تستحمى لحد ما يتنزلوا ويدوكى 2 جنيه شفقه على نفسهم


ههههههههههههه

بهزر اوعى تزعلى

انا مكنتش باخد فلوس على الحمى
بس كنت باخد 2 جنيه على كبايه الشاى


وبعد اما تزوجت بعمل شاى وبديلوا كمان عليها 2 جنيه



كل حمايه ووانتى طيبه

قصدى كل سنه وانتى طيبه

البت المشمشية حلوة بس شقية يقول...

الرومـيصاء
الواحد يبنتى خلاص مبقاش يعرف يطلع بمصلحة فى بتنا ده


وعدين كوباية شاى ايه يبنتى
كل حاجة بعملها فى البيت بتمنو مفيش حاجة ببلاش
نورتينى

شمس وقمر يقول...

كل سنة وانتي بخير

بوست دمه خفيف جدا

اتمنى زيارتك لمدونتنا المتواضعة
دمتي بخير

البت المشمشية حلوة بس شقية يقول...

شمس قمر
فكرتينى بللعبة دى كنت بحبها اوى وانا فى المدرسة
من عنيا هزور مدونتك الجميلة

Maha Shahen يقول...

كل سنه وانتى طيبه ولو انها متأخره شوية
ومساهمه منى بدل ما تقعدى تلمى من الاخوه المدونين لو انتى من القاهره اجبلك اللكلوك هديه وخلاص ههههههههههه
ربنا يخليلك مامتك ويخليكى ليها ومترسميش انك بريئه ما انتى كمان مستغله وطلبتى مقابل لفعل الخير هههههه
ربنا يسعدك يا رب ويوفقك

بنت مصريه يقول...

المهم ف الموضوع دا كله
استحميتى ولا لا
هههههههههههههههههههههه
بقولك ايه انا مش هدفع حاجه ومعديش دم بقى اذا كان عاجبك

كل سنه وانتى طيبه يا قطقوطه

البت المشمشية حلوة بس شقية يقول...

nour shahen
شكلك داخلة تهدى النفوس
وبعدين انا مش ساكنة فى القاهرة وهتيجيبى الكلوك بردو
هههه
نورتى ياقمر





بنت مصرية

ايه يابت البلطجة اللى انتى فيها دى
يعنى ايه مش هتدفعى حاجة
هصرف من جيبى يعنى ولا ايه
اة يختى فى الاخر خدت على دماغى واستحميت
نورتينى ياقمر

hasona يقول...

من غير اتفاق ولا حاجة
انت عملت اللي عليكي وزيادة
،،،
وبالنسبة للربع جنيه
نقعد ونتاحسب بقي
أكيد لميتي أكتر من ثمن اللكلوك
يبقي تجيبي الزيادة لي- كثرة المال تسوس الأسنان000000
ولو لسه ما جمعتيش ثمنه
يبقي لازم نزود التعريفة الجمركية للمرور من هنا
،،،
ربنا يجعل أيامك كلها أعياد
وكل سنة وانت طيبة

تحياتي

Monzer يقول...

ربع جنيه

أنا جيت غلط تقريبا

احنا داخلين نتفتش هنا ولا ايه :))

كل سنة وانتي طيبية

حمادة زيدان يقول...

البت المشمية

كل سنة وانتي طيبة مع انها متأخرة موت

البت المشمشية حلوة بس شقية يقول...

hasona
ايه ياعم انتا جاى تبصلى فى اللقمة اللى جيالى ولا ايه
اصل انا ناوية افتح محل لكاليك
نورتنى



Monzer
تعالى هنا انا شيفاك انتا هتزوغ من الدفع ولا ايه
نورتنى



حمادة زيدان
ولا يهمك وانتا طيب يا جميل