الثلاثاء، 6 يناير 2009

انا مش معاهم

انا عايزة اكلم عن حاجات بفكر فيها
عن اراء بسمعها
وعايزة افهمها
انا مش بكتب عشان كلو بيكتب فى نفس الموضوع
لاء انا بكتب عشان انا عايزة اكلم هنا واطلع اللى جوايا
وعشان محدش يقول البت دى تافهة فى الوقت اللى غزة بتضرب دى  عاملة تاج وفرحانة بيه
لاء انا مش عاملة البوست ده عشان حد يقولى اة انتى فعلا اهو حاسة بلوضع
لاء انا حاسة بيه غصب عن اى حد ومحدش يقدر يقول غير كدة
لكنها محاولة منى لتخفيف الم اى حد
لذلك انا هكلم عشان انا عايزة اكلم
سيبكو من كل اللى فوق ده
هكلم انهاردة عن الريس
محمد حسنى مبارك
سعات اسمع بابا يقول
حرام اللى بيحصل لنا ده
وسعات يقول ما الراجل كتر خيرو
هيعمل ايه تانى
اراء متناقضة ارجع واقول حسب كل موقف
لاكن دماغى تفضل تفكر
الناس اللى بتطلع ع الفضائيات دى وتتششك فى وطنية مصر
وعايزة مصر تخوش فى حرب
ومدونين كذلك
اقولك واحنا مالنا
نخوش فى حرب ليه
احنا نقدر نساعد
نحارب احنا ليه
ناس تموت من عندنا وندخل البلد فى صراع اتقفل ليه
هتقولو ايه الهبل اللى بقولو ده
قولو زى مانتو عايزين تقولو
لو كل ادول هتتجمع عشان تحارب باسم العروبة عشان مصر
هقول ماشى
لاكن االناس اللى عايزة مصر فى وش المدفع
اة اسرائيل مدفع
عندنا اسلحة زيها
لاء
عندنا تكنولوجيا زيها وزىامريكا
اقول لاء
لاء والف لاء
يبقى نلم نفسنا وبلاش الحماس الزايد ده
يعنى لو اللى بيطلعو فى مظاهرات فى مصر دول
انا مش ضد الماظاهرات
لاء ابداا
بس اللى عايزة اقولو بلاش شعارات
لو جه واحد فى وسط المظاهرة
وقال
يلا فلسطين معبرها اتفتح
اللى عايز يدخل يحارب يحارب
اتحدا لو راح حد
ممكن اتنين  تلاتة
اربع
اكترمن كدة لاء وانا متاكدة
كل واحد ساعتها هيفكر فى اهلو
فى الناس اللىوراه
يروح يحارب مين
يحارب بطوبة قدام طيران ودبابات ع الزيرو يابا
صلى ع النبى بقه
والناس اللى طالعه تشتم فى الريس
هو المطلوب منو يقول انا داخل احارب
اللى بيكلمو دلوقتى مدقوش مرارة الحرب بيشوفوها فى التلفزيون وبس
وزعلو ويتأثرو ويشتموالنظام
الله يرحمالسادات
كل العرب اللى قالو سعاتها
كلو يخاصم مصر اللى السادات رايح اسرائيل يعمل معاهدة معاها
عشان خايف على شعبووعايز يتقى شر الصهاينة
وعمل المعاهدة وقال لرءساء الدول تعالو
اعملو معاهددة معاهم
محدش جه
حتى ياسر عرفات
كلهم خاصمو مصر
ولغوكل الاتفاقيات معاها
ونقلو جامعه الدول لتونس
وقالو مصر كخ
مصر وحشة
وفى الاخر
بكرة نقعد الحيطة ونسمع الزيطة
واهى الزيطة شغاله اهى
عايزين مصر تدخل حرب
طيب ماحنا فى حرب
حرب داخلية
الناس مش لاقيه تاكل
الشباب مش عارف يجوز
الناس مش لاقيه شغل
ناس بتشحت
ناس بتغتصب
ناس بتبيع بانجو وحشيش
ناس بتتحرش
قضايا كتير اوى
تفتكرو دى مش حرب
دلوقتى هتقولو عليا
دى بقه مع النظام لاء بقولها وبعلو صوتى
انا مش معاهم
انا معاكو
مطرح ماهتروحو وراكو
زعلانة من الحكومة عشان احنا كدة
مصر حلوة
وبيجيلها فلوس وموارد واحاجت كتير بس ده كلو فين مش بنشوفو
يلا معلشىحبيت اقول اللى جوايا وكنت بفكر فيه
اللى هيدخل يشتم هطلع عينو
وانا
المرادى مش بهزر
انا بكلم جد جد جد
ورقصنى يا جدع
سلالالالالالالالامووووزبللبن  مع حتة جاتوه
المناضلة المكافحة  ذات الاراء الصاروخية البومبية
مشمشمة

هناك 84 تعليقًا:

adel يقول...

هو انا اول تعليق

adel يقول...

كويس برضه

ههههههه

ايه اليوم ده حروف الضهر و مش شوية
soul و دلوقتي انتي :):)

انا عاوز اكتب يا جدعان ....

adel يقول...

اننا معاكي في كل كلامك و مش هناقرك كالعادة او ارخم

انا متعاطف مع غزة .... لكن مش هحارب

انا هحارب عن العيال اللي بتموت عندنا و مش لاقين حد يحميهم

هحارب الانحلال الاخلاقي و التحرش

هحارب الجهل و التعصب و الغباء

هحارب السلبية

اللي عاوز يحارب محدش هيمنعه و فعلا في واحد مصري سافر من يومين

بس انا عندي حاجات اهم في بلدي

و الكلام ده مش كلامي انا بس

----------
10/10 يا مشمشة

mostafa rayan يقول...

تعليق اول مكرر
ههههه
اه صح اول مكرر
- بصي بقي ان شايف ان الحل مع اسرائيل الحرب لكن مش دلوقتي احنا مش مجهزين لكدة
ومصر كما مش هي اللي تحارب لوحدها لازم العرب كلهم يتوحدو ويدخلو الحرب لكم مصر لوحدها لاء
امريكا بذات نفسها بكل جيوشها وعتادها لماجت تحارب العراق مادخلتش لوحدها احنا لو اتوحدنا هنقدر نضرب اسرائيل لكن لوحدنا لاء
لازم الناس تفهم كدة الحرب مش خطب ولا حماس مظاهرات الحرب دي عايزة استعداد ونفس طويل
تحياتي ليكي ودمت بخير

Unknown يقول...

انا هابعتك انتي غزه تحاربي لوحدك و من غير طوبه حتي

بصي يا حبيبتي يا مشموشه انا معاكي جدا مصر ليه تحارب لوحدها ليه ارمي ولادي فياتون حرب يا عالم هاينتهي امتي و ازاي

نعمل جيش عربي كبير يضمن كل الجنسيات تحت قياده و تدريب مصري و تمويل خليجي كده اوك نبقي ايد واحده

بس مش ولادنا يترموا في النار و باقي العرب واقفين يقولوا برافو

مبارك بشر يخطئ و يصيب ليهانجازات و ليه وكسات

ربنا مع كل العرب

انسانةعادية فى عالم مش عادى يقول...

ياخبر عقلك والله العظيم لو انتى قدامى هضربك اه واكسر رقبتك كمان حرب ايه يامفتريةانتى اللى مصر هدخل فيها مين المغفل اللى قالك حماس عايزة مصر تحارب معاها علشان نحدد من الاول كده اصلا القضية الفلسطينية مش قضية اهل فلسطين بس لا طبعا دى قضية عرب ومسلمين كلهم المسجد الاقصى ملزم الدفاع عنه من كل المسلمين واللى بيدافع عننا دلوقتى الفلسطينين والله كتر الف الف الف خيرهم على دورهم ده
مش مش هتحارب ولواحدها لازم الدول العربية كلها تتحد المطلوب من مصر دلوقتى مش حررررررررب ياااااااااجماعة افهموا الله يخليكم كل اللى مطلوب منها مش تساند العدو وللاسف مش بتعمل كده قفل معابر ومنع مساعدات عن غزة وتصدير بترول لاسرائيل وخيانة وحاجة تقرف مصر مش ضعيفة زى ماانتى فاكرة ولا اسرائيل قوية وتقدر تبيد العرب لا والله والله والله والله ربنا وعدنا بالنصر القريب ان شاء الله بس المفروض اننا نتحد ده المطلوب اللى لازم تعرفيه ان الدور جاى على مصر جاى جاى مفيش نقاش ده خطة مرسومة ومحكمة ومن النيل للفرات فلسطين العراق سوريا لبنان ومصر واعتقد كل الدول دى احتلت او احتل جزء فيها والدور على مصر وبما اننا مش بنقف جنب اخواتنا فى شددتهم ولا حد هيعبرنا فى محنتنا
معاهدة السلام اللى عاملها انور السادات اسوء شئ عمله فى حياته كانت حركة فردية منه وبعيد عن الجماعة ربنا قالها كلمة عمر اليهود ما يعرفوا معاهدات انتى متخيلة طول السنين دى عايشين بسلام تبئا موهومة وشوفى الجنود اللى بتتقتل على الحدود بنار الصهاينة
فلسطين مش منتظرة حاجة من حد دول على الرباط ليوم الدين دول الشعب اللى ربنا اصطفاه لاعظم شئ فى الدين والاخرة الجهاد والشهادة
ناس الايمان عامر فى قلبهم
اما مبارك مش هقول غير حسبنا الله ونعمة الوكيل ضيع شعبه وضيع شعوب تانية معاه وعذابه عندالله اشد عذاب
ربنا يهدى

قلم رصاص يقول...

ههههههههههههههههههههه

ايه البوستات الجامدة اوي دي يابت يامشمشمه انتي هههههه جديد عليكي خالص الكلام في السوياسه

بس بجد بجد والله أحسنتي بكل معاني الكلام

وقلتي كل اللي بتحسي بيه واحنا اكيد حسينا بيه لأنك نقلتيه بتلقائية غير عادية متحليه بالمهلبية هههههههههه

بصي ياستي ندخل في الموضوع بقى

اولا من حيث التجهيزات و الامكانات العسكرية التقليدية(الغير نووية يعني)
مصر لوحدها قادرة تكسر دماغ اسرائيل وتمرغ مناخيرها في الأرض ..دي حقائق لاجدال فيها ..رغم تفوق اسرائيل علميا وتكنولوجيا وتخفلنا الى حد ما في المسائل دي..الا ان قطاع القوات المسلحة المصرية يعد حاليا من اقوى واحدث جيوش العالم ..ومش عاوز كلام شعارات ..دي حقيقة فعلا

ده بالنسبة لمصر بس ، لو ضفنا لها بقية الدول العربية هيميل الميزان بقوة لصالحنا كعرب جميعا ..يعني باختصار عاوز اقول ان قوة العرب العسكرية التقليدية تقريبا 15 مرة مقابل اسرائيل

طيب لماهو كده ياقلم رصاص ليه مش بنحارب اسرائيل ونأدبها..أرد واقول زيك بالظبط الحرب مش لعبة وفيه هيكون خسائر من الطرفين كبيرة جدا جدا جدا
ومين هيستفيد في الاخر بعد مانصنا يكون مات على الاقل في الحرب ..دي نقطة

النقطة التانية ،فيه حاجة اسمها الردع العسكري

وده معناه ان كل قوة او طرف عامل حساب للطرف الاخر وميقدرش يهوب ناحيته لذلك يظهر مايعرف بتوازن القوى

كل الكلام الفاضي اللي فات ده كان عن القوة التقليدية

اما لو انتقلنا للحديث بقى عن القوة العسكرية الغير تقليدية والمقصود بها السلاح الذري .. فاحنا طبعا صفر على الشمال كلنا كعرب ومتطقة شرق أوسط بالنسبة لإسرائيل ..بكل أسف يعني

لأنها تمتلك مايزيد عن 300 رأس نووي قادر على سحق الدول العربية في نص ساعه لاتزيد ..ده أكبر تقدير يعني


فحتة الحرب دي غير مطروحة بالمرة على الاطلاق في أي اجندة مصرية حتى والنبي لو الاخوان المسلمين اللي مقطعين نفوسهم من العياط على غزة مسكوا الحكم ..برضه مش هيحاربوا اسرائيل .. انتهت الفكرة دي تماما على الاقل السنين اللي احنا فيها دي


نيجي بقى لبدائل الحرب ، وده الكلام العملي بعيد عن النقاشات او الشعارات

احنا نقدر نعمل حاجات بسيطة ترد لنا كرامتنا وتشفي غليلنا وتغيظ وتفقع مرارة اسرائيل بدووووووووووون مانجبرها على الدخول في حرب ضد مصر ونحافظ على نفسنا وعلى وضعنا

يعني نمسك العصاية من النص

زي اننا نقطع العلاقات الدبلوماسية مثلا

او نوقف تصدير الغاز ،
دا حتى المحكمة الادارية العليا امبارح اصدرت حكم برفض اسشتكال هيئة قضايا الدولة بإستئناف حكم وقف تصدير الغاز لاسرائيل..يعني الحكاية خادمة نفسها اهه شعبيا وقضائيا ومفروض تتوج سياسيا زائد مردودها الاقتصادي طبعا


أشكرك بامانة يامشمشة على البوست الهايل بتاعك والله

بارك الله فيكي ووفقك في امتحاناتك

في حفظ الله

خالتى بمبة يقول...

مع سياسة البلد او ضدها مش مهم لكن الحق يتقال ان في الموضوع ده مصر متقدرش تعمل اكتر من كده لان مش معقول يضحي بشباب البلد في مغامرة مش محسوبة وكمان مننساش ان بلدنا فيها ازمة اقتصادية مش ناقصة تدخل في متاهات تانية وليس في الامكان افضل مما كان

Ahmed يقول...

ازيك ياجميل
عامله ايه؟

بصي ياستي
أنا موافق معاكي أنه مينفعش نطلب الحرب لوحدنا
ومينفعش نطلبها دلوقتي
ومينفعش نقول مبارك هو السبب
وبرده مينفعش نفضل سكتين على طول

عشان كده أنا بأييد فكرة اللي يقدر يعمل حاجه وميعملهاش يبأه لموأخذه (...)

وأنا مؤمن أننا نقدر نساعدهم
ندعيلهم
نتبرعلهم
ندعمهم
نعمل أي حاجه نقدر عليها

على الأقل عشان لما نتسأل عنهم قدام ربنا, نلاقي حاجه نقولها

اهو ياستي, ولا شتايم ولا حاجه
مؤدبين طول همرنا

سلاااااااااااام

بنت الغربة يقول...

اجدع كلام والله
ده برضه رأى - الناس مطحووووونه فى مصر ومحتاجه حد يساعدها مش يقولها روحى حاربى
انا معاكى اننا مش قد الحرب والى مفنجر بقه وبيقول يالله نحارب يروح لوحده يجس النبض الاول ابقى قابلينى لو رجع
تحياتى ليك
مستنيه زيارتك

Unknown يقول...

ممكن أفهمك حاجة
أو أوضحكلك حاجة وحدة
مقلناش مصر تدخل حرب بس يفتحوا المعبر لخلق الله الي بتموت النعبر اتقفل تماما يوم الإجتياح البري دخل غزة ليه خايفين يجو مصر لأ ميخافوش اسرائيل مش غبيه فاهمين بيعملو ايه كويس لإن المعاهدة بتقول ان المعبر يتفتح في أوقات الطوارئ وإسرائيل متقدرش تقول بم ليه لإن المعبر مصري كله وهي موقعه على معاهدة سلام مع مصر لو خالفوها هيقومو عليهم مجلس الأأمن وهما عاوزينه معاهم طبعا ومصر طبعا فيها موارد انت عارفة لو الريس بتاعنا عاوز يحارب وحياة ربنا يقدر ويقدر يجيب أجلهم متقوليش لأ يقدر بالفلوس الي عمالة تتشفط دي ليل نهار ما إيران موجودة وسلاحها الله ينور وحزب الله موجود شيعة بس مسلمين هيساعدو ويبقى اتحاد عسل قوي دول متأكد مليون في المية هيساعدو لو حد قال يا حرب بس احنا معلش الي بنتقي الشر وخايفين مع انه دلوقتي شرعا وجب الجهاد ده رأي الدين مش رأيي بس الحكام العرب ناموا وسحبوا الحاف ولا كإن حد سامع حاجة
خير ربنا ينصر أهل غزة ويقتل إسرائيل بسلاحها
اللهم آمين
معلش لو طولت عليكي
مودتي

حروف يقول...

يا جدعان بلاش خناق انا زهقت من كتر مابقرا الموضوع وبعلق علية صدقوني اسرائيل مش هابلة لو احنا فتحنا المعبر فلسطنين حيجوا يسكنوا سينا وحماس حتضرب اسرائيلوهما ف سينا يبئا اسرائيل تعمل ايه تردعليهم وتضرب سينا ياجدعان حلم من النيل للفرات لسة موجود
بت يامشمشة خلي باللك ع روحكيابت هما قفلوا المعبر وفتحوا المعتقلات يابت روحي زاكري احسنللك او اكتبي امضاء انك غير مسؤلة عن اللي بتقولية وانكمريضة نفسيا وجيبي شهادة ب 2 جنية ونص اهو قبل ما الفاس تقع ف الراس
سلام يا اختي

حروف يقول...

وبعدين ياسي عادل ماللك بيا بئا انتوا كلكم عليا ولا ايه روحيا اخويا ذاكر

البت المشمشية حلوة بس شقية يقول...

adel
اة ياخوية او لتعليق مستغرب ليه كدة

البت المشمشية حلوة بس شقية يقول...

adel مالك
داخل بزعابيبق ليه
انتا هتتخانق معانا
ولاايه

البت المشمشية حلوة بس شقية يقول...

adel
يااااااا غريبه مش هنتناقرنى يعنى
وترخم عليا كاعادة
اهو انا بكلم على كدة
احنا ندخل حرب واحنا اساسا جوة مصر حرب انيل ومشاكل اكبر
10/10
طب وفين النجمة والشيكولاتة

البت المشمشية حلوة بس شقية يقول...

mostafa rayan
اول مكرر ايه
انتو فى المدرسة يا جدعان ولا ايه
هههههههه
صح
احنا مش جاهزين وبلاش شعارات
اما نبقى عندنا قوم وجهزين نبقى نكلم

البت المشمشية حلوة بس شقية يقول...

EmY
اخس عليكى يابت انتى
انتى عايزة تخلصى منى ولاايه
ماااااااشى
ليكى يوم ياظالمة
صح
فعلا
مبارك بشر
وبيغلط
وليه وكسات وليه حاجات كويسة
وبلاش نشتم وخلاص

البت المشمشية حلوة بس شقية يقول...

انسانةعادية فى عالم مش عادى
اة باين عليا اتجننت وحاتلى سخونية فى دماغى
كل الكلام الى انتى بتقوليه صح طبعا وكلنا معاه
بس تفتكرى ينفع
اقرى تعليقات الناس عندى كويس وشوفى رد فعلهم وانتى تعرفى
اللى انتى بتقوليه ده هواللى مفروض يتعمل من الاؤل ومن زمان
واللى واجب علينا نعملو
بس فين وامتا وازاى وبتقولى الكلام ده لمين

البت المشمشية حلوة بس شقية يقول...

قلم رصاص
ايوة طبعا
انا متنوعه كوكتيل يعنى
بكلم فى كل حاجة عشان اغيظ ناس كدة
واخد ببالك
انا اول لما شوفت تعليقك
كان هيغما عليا
انتا حللت الموضوع تحليل كبير اكبر منالبوست نفسو
وعايزة اخد نفسى على ماوصلت لاخر بوست
انا مش هعلق على كلامك
عشان كلامك
هو كلامى كلامنا كلنا
كلام الناس اللى بتفهم وخايفه على مصر صح
لو العرب كلهم اتجمعو اقدر اقولك
انهم قوة
يقدرو يعملو حاجة
لاكن ازاى
وكل بلد ليها مصالح مع اسرائيل
ومتقدرش تزعلها
لذلك بيحطو جذمة فى بؤئهم ويسكتو
وميكلموش يوروا للعرب انهم زعلانين على فلسطين ازاى انهم يشتمو مصر كويس وزايدو عليها هما ده اللى احنا فالحين فيه
شاطرين العرب فىالغنا والرقص والهجس

البت المشمشية حلوة بس شقية يقول...

خالتى بمبة
ههههههههه
انا اول لما شوفت العنوان عجبنى اوى يا بومبة
هزورك عشان اشوف البومب اللى عندك
وتدينى شوية بربع جنيه

بلنسبة للكلامك
بجد يعنى انتى من اكتر الناس اللى علقو عندى ع البوست ده
وعجبنى رايك كدة
ليه ارمى ولادى فى النار وانا مش جاهز لده خالص
ليه؟

البت المشمشية حلوة بس شقية يقول...

Eng. Ahmed Abo El-Ella
هو كلو كلو مينفعش مينفعش
ههههههههههه
انتا صح
احنا نقدر نعمل كتير من غير منحارب
زى الحاجات اللى قولتلها دى
ومن غير شتيمة ياعم
سلاموووووووووووز

البت المشمشية حلوة بس شقية يقول...

بنت الغربة
اولزيارة ليكى ومش هتكون اخر زيارة

بلنسبة للكلام اللى بتقوليه
اهو ده كلام الناس اللى فاهمة الواقع بجد
مش شعارات ومفروض نعمل ونعمل
احنا مفروض نعمل حاجة فعللا
بس مش احنا الحكومة

خلى الناس تروح تجس النبض ابقى قابلينى لو رجع فعلا

البت المشمشية حلوة بس شقية يقول...

كاتب مصري
شرعا واجب الجهاد
فعلا عندك حق
بس لما نفتح معبر ويجو الفلسطنين يسطوتنو فى سينا
وتيجى اسرايل وراهم تحاربهم
حبة حبة
تدخل جوة مصر
يبقى صراع والهدف القضاء على الفلسطنين
مانا ممكن اساعدهم جوة بلدهم
معرضش بلدى ابدا لخساير وحافظ على ارواح الناس مش كدة ولا ايه ؟

البت المشمشية حلوة بس شقية يقول...

حروف (دلو مرة ثانية وجرح ثاني سابقا)
ايه ياحجة
مانتى بتعرفى تتكلمى فى السياسة اهو
مش كلو كئابة بس
جدعه
انتى صح
نفتحو عشان نجيب لنفسنا الكفيه بعد كدة
ومنقدرش نوقف بحر الدم اللى هيحصل

واكتب شهادة على نفسى ليه يختى
ماهى عندى فعلا
هههههههههههههه
لاء طبعا
انا مسئولة عن كلامى كلو وفرحانة انا بكلم واقول بحرية

البت المشمشية حلوة بس شقية يقول...

حروف (دلو مرة ثانية وجرح ثاني سابقا)
وبعدين انتى جاية تتخانقى مع عادل هنا
هش ياماما انتى وهو اتخانقو برة المدونة
ولا حتى اشربيه موتيه عشان نخلص منو ومن لسانو

Unknown يقول...

ايه يا بنتي شكلك زعلتي ع الآخر ومفهمتيش قصدي
احنا طالما مسلمين يبقى لازم نساعد ونعمل أي حاجة يا ستي خلي مصر تساعدهم وهما في بلدهم بس هو فين المساعدة الممعبر الي اتقفل ولا عاد بيعديلهم مساعدات ولا بتاع
يا ستي الإختلاف في الرأي لا يفسد للود قضية مش كده ولا ايه
هحل التاج بتاعك وهأبقى أقولك
وبلاش تتخنقي بسرعة كده احنا بناخد وندي
ربنا يكرمك
مودتي

nody يقول...

بصى طبعا انا معاكى قلبا وقالبا

كل واحد قاعد فى بيتهم مش لاقى حاجه يعملها يزايد على مصر
والمطلوب من مصر انها تحارب لوحدها
وقسما بالله لو البلد دى خربت مافى واحد منهم ها يعمل لنا حاجه
ومش بعيد امريكا تضربنا من القواعد العسكريه الى فى الخليج
وساعتها لو اتدخلوا ها يتخدلوا علشان يلحقوا ياخدوا اى حاجه
على مبداء لو خربت دار ابوك خد لك منها قالب
مش اكتر من كده
والى عمالين من عندنا يقولوا نحارب نحارب
دول فنجريه بؤ مش اكتر

تحياتى

البت المشمشية حلوة بس شقية يقول...

كاتب مصري
ههههههههههه
انتا شكلك فهمت كلامى غلط خالص
بلعكس انتا من اكتر الاراء اللى عجبتنى على البوست ده
انتا فهمت اسلوب كلامى غلط انا بتكلم مع نفسى وبناقشها
هههههههههههههههه
مش بعترض على كلامك خالص
بلعكس كلامك صح الصح

البت المشمشية حلوة بس شقية يقول...

nody_1987
صح
فنجرية بؤء وساعه الموقف الحقيقى بقه
متلاقيش حد منهم بينطق ولا يكلم
عندك حق والله
نورتينى

amnesia يقول...

بحييكى على كلامك.. واحسهسك باين من غير ما تقولى..

بس مين الى عايزمصر تحارب معتقدش ان ده راى الشعب ولا انا موافقه اللى يقول كده

لكن انا مش موافقه اننا ناخد موقف محايد من غير اى رد فعل قوى

لان فى الى احنا فيه ده لازم يبقى فيه رد فعل قوى وخاصة من العرب الى هو اخنا منهم

بيصعب عليا لما الاقى الاجانب واللى مش مسلمين بياخدوا رد فعل اكبر مننا

زى ما حصل فى تركيا وطردت الفريق الاسرائيلى من الماتش وكانوا هيموتوهم لولا التدخل ال حصل

وفنزويلا الى طردت الثنصل الاسرتئيلى من عندها

والى سموهم القتلا الظلما

احنا فين مين كل ده

بذمتك مش بيصعب عليكى كل ده يحصل قدامك من ناس مش مسلمين او حتى مش عرب
وانتى تبقى واقفه بتتفرجى

اه بنتفرج احنا معملنش حاجه برده زى ما غيرنا عملوه

ربنا معاكى يا غزه ..

Dr. Ibrahim يقول...

الموضوع كبير

المفروض كل واحد يعمل اللى عليه فى مجاله

والباقى على ربنا ولكن الفساد منتشر

وسوء الأخلاق والبعد عن الدين منتشر

فالنتيجة معروفة مسبقاً

تحياتى

البت المشمشية حلوة بس شقية يقول...

amnesia

اة طبعا يصعب عليا واحنا حالنا كدة
موطين راسنا فى الطين
نفسى نعمل اى حاجة
نقول احنا اهو موجودين
نقدر نعم لحاجة
بس للاسف هنفضل كدة لحد امتا مش عارفه

البت المشمشية حلوة بس شقية يقول...

Dr Ibrahim samaha
كلامك صح الصح يادكتور
اللى نقدر نعلملو
ان كل واحد يجتهد فى مجالو
عشان نقدرر نكون حاجة
شرفتنى

عماد يقول...

ممكن إعلان لو تكرمتى ؟

أمينه و ساره , سامحونا

http://somethingforthesoul.blogspot.com/2009/01/blog-post.html

MaNoO يقول...

[س بقى كده سيبونى انطلق الكلام الصح ومع احترامى للجميع لو حد تانى كان ماسك مصر غير الرئس مبارك تفتكروا كان هيتعامل مع القضية دى ازاى طبعا اى حد تانى كان هيقول لا عرب واعرب ويفتح المعابر وتخرب البلد اه والله دا اللى هيحصل خلونا نتكلم بصراحة (الاخوان) اللى عايزين مصر تحارب طيب وبعدين مانت بتتكلم من الشارع مش فاهم حاجة مش عارف فى ايه اللى بيحصل هوا الصح ومع ذلك خلو العرب يفكروا يعملوا جيش كدا ومصر طبعا هتبقى فى المقدمة بس هما الاول يتفقوا بلا خيبة

البت المشمشية حلوة بس شقية يقول...

MaNoO
بجد يعنى 10 على 10
اهو انتا كدة فاهم
مش ماشى مع الهوجة وخلاص

مـجـنـووون يقول...

السلام عليكم ورحمة الله وبركاته

والله انا بحترم رائيك وبقدره بس أحب اوضح ليكي حاجات انتي فهمها غلط

اولا : لو انتي لقيتي حد من أهلك بيتعارك مع واحد والراجل التاني راجل قوي ولو اتعركتي معاه مش هتعرفي تعملي حاجه . هتسبيه يضرب بابا او ماما من غير ما تقوميه وتعملي إلي عليك ؟؟؟؟

ثانيا : بالنسبة للي بيحصل لمصر في الوقت ده ففعلا مصر تستاهل الهجوم ده . لأن مصر بجد مقصره قوي في الي بيحصل في غزة والسبب

1- التصريحات العبيطة من ابو الغيط والمسئولين الي بيقولوا فيها أن حماس تستاهل الي بيحصل فيهم ولازم يتربوا ويستحملوا نتيجة مقومتهم لليهود واختراقهم للهدنه . مين الي اخترق الهدنة بقي بتوع غزة المحصرين من 18 شهر و 218 واحد ماتوا بسبب الحصار يبقوا هم الي يستهلوا

2- مصر طول عمرها كبيرة وديما بتخدم القضية الفلسطنية والي عملته مصر لغزة قليل قوي عن الدور الي الدنيا كلها منتظرها من مصر في الوقت ده

3- الي اهل غزة بيحبوا عشناها هي المسجد الاقصي والأرض الي سيدنا موسي عدي البحر علشان يروح لها وهي الارض الي سيدنا عيسي هينزل فيها ويقتل المسيح الدجال وهي الي الرسول قال فيها ( لو اردتم ان تنظروا الي قطعة من الجنة فانظروا الي المسجد الاقصي )

4- اهل فلسطين متحملين الجهاد ان مكان المفروض علينا أن احنا نقاتل معاهم مش نساعد ضدهم

5- بالنسبه للمظاهرات .والشعرات فدي ااقل حاجه ممكن نقدمها لأهل فلسطين علشان ربنا لما يسالنا يوم القيامة عملتوا ايه لاهل غزة نقوله خرجنا يا رب في مسيرة او مظهرة علشان مكناش نقدر نعمل غير كده . وبعدين أعظم الجهاد كلمة الحق عند حاكم ظالم

6- المفروض نبطل نفكر في الأكل والشرب ونفسنا ونرتقي بنفسنا لحاجات أعلي من كده

معلش انا غلس قوي في تعليقي بس بجد حسيت بضيق لما قريت كلامك وحبيت اخرج حاجه في نفسي

تقبلي مروري
مجنووون

adel يقول...

البت المشمشية :
=--------------
انا ولا بزعق ولا حاجة .....و بعدين نجمو و شوكولاتة و مصاصة كمان .... انتي تأموري
بعد الكلمتين الجامدين بتوعك دول


------------------
حروف:
------
تاني ...... ما قلنا و الله بذاكر .... ااقطع نفسي يعني


و كفاية اني مش عارف امتب حاجة جدبدة علي البلوج :(

غير معرف يقول...

بوست جميل اوي يا مشمشه
بجد تسلم ايديكي

بصي
حلو اوي اننا نتعاطف مع غزه
لكن مش معني كدا اننا ندخل الحرب

تحياتي

مسدس صغير يقول...

لقد زكرتنا الاخت مشمشية بمناضلات من زمن فات امثال جميلة بوحريد وهدى شعراوى وزينب الغزالى وعزيزة مصاطب وتهانى عما تفرج ونوال بظروفها نشكرك باسم منظمات حروق الانسان ونقدم لكى اجمل التهانى . وسمعنى يابنى بلادى بلادى لكى حبى وفؤادى

david santos يقول...

I love your posting and blog!!!
Congratualtions!!!

FREE PALESTINE

Sionism terrorist, no!!!!!!!!!!

فارس القمر يقول...

من لم يهتم بامر المسلمين فليس منهم
هو المفروض ان مصر تعمل حاجه لان دا واجب عليها
واللى سمعتيه من الرؤساء العرب دا هما نايمين فىالعسل وعاوزنا احنا اللى تغرق فى الحرب زى 73 كدا حاربنا لوحدا ولما جينى نعمل سلام اتحدوا وزعلوا مننا ليه مايتحدوش دلوقتى ويقومى جيش العربى مش فالحين الا فى الكلام وبس وعلشان احنا الاقرب لغزة متطاولين علينا احنا اللى دافع
سوريا ولبنان والاردن كل دول ماش قريبين انهم يعملوا اى حاجه اشمعنا احنا اللى دايما فى وش المدفع

انا متضامن معاكى فى كلامك بس مش معنى كدا اننا نقول مالناش دعوة

arsenalwy يقول...

مش كل حاجه حرب

الحرب ما هى الا الدمار وسيبكوا من اى حد بيتكلم عن مصر اللى فى ايده حاجه يعملها

بس فى نفس الوقت الناس اللى بتهاجم مصر معزورين فالقيادات السياسية شغالة تشحن فيهم فمنتظرين منهم ايه

ذو الوجه المبتسم يقول...

السلام عليكم
اسمحى لى بالدخول لاول مرة بمدونتك
الكلام كله جميل
منقدرش نقول حاجة عنه
وكل التحليلات او معظمها صح
ولكن هناك بجد امور سياسية احنا كمواطنين عاديين منقدر نستوعبها او نتخذ قرار فيها
مثال فتح المعبر
اسرائيل عاوزة كده
عاوزة مصر تفتح والفسطينيين يدخلو وبعدها ينقفل
ويفضلوا الفلسطينيين بمصر
وتبقى ارضهم
يعنى بالمفتشر كده يحتلو مصر
اما عن الاوضاع الحالية
مفيش مسلم يرضى باللى بيحصل ده
من لم يهتم باكور المسلمين فليس منهم
ولكن ماذا علينا ان نفعل
؟؟؟؟؟ ليس بايدينا حاليا غير الدعاء والتبرع والحاجات البسيطة دى ؟!
لكن حرب
اولا دى مش ارضنا
ثانيا لو اسرائيل فكرت تدخل مصر وتحارب تانى
صدقينى احنا قدها مية مرة
مش بالسلاح .. لكن بالايمان بالله
ومتستعجليش على رزقك
يمكن يجى اليوم واسرائيل تنفذ مخططها بالفعل وتيجى مصر
وقتها ؟؟؟؟؟؟؟
ربنا يوفقك
اعجبنى اسلوبك فى السرد
وكمان تفكيرك جميل
تقبلى تحياتى

dodda يقول...

how old r u?????

Empress appy يقول...

محدش قال لمصر حاربى واحنا مش هنحارب بس بنقول اعملى اللى عليكى انتى وكل الدول
محدش طلب من حد يحارب لاننا مش عارفين نحارب علشان روحنا احنا بقينا بنخاف ونسكت
وعلى فكره مش حرام انك تدافعى عن واحد مسلم زيك مشاكلك كلها فى الايام العاديه انتى محلتيهاش فمتعمليش نفسك مشغوله دلوقتى بحلها فاهمه قصدى يعنى
انا اعرف ناس عاوزة تحارب علشان طفل فالموضوع مش متعمم بس احنا اللى بنفهم على مزاجنا احنا قولنا نضغط على الحومه وعلى العالم علشان غزة

شوية قهوة يقول...

يااااه
ساسة وكمان سياسة مصر
لا حول ولا قوة الا بالله
يلا عموما انا مش هعلق

البت المشمشية حلوة بس شقية يقول...

ـجـنـووون
كلامك عن مصر
صح الصح
واحنا فعلا مقصرين
بس بردو محدش يقدر يغفل
دور مصر
من زمان
جمب القضية الفلسطنية

نورتنى وانا جيالك ازورك
حضر الشاى

البت المشمشية حلوة بس شقية يقول...

adel
ماشى ياعم انا
مشوفتش منك حاجة لسه
ولا شيكولا ولا حتة كيس هريدى

البت المشمشية حلوة بس شقية يقول...

hager za3bal
قولتى المفيد
نتعاطف
بس ندخل حرب ليه يعنى
لازم ندخل بس مش لوحدنا
نورتى

البت المشمشية حلوة بس شقية يقول...

مسدس صغير
انتا بتتريق
والله شوفتى مشمشية واحد بيتريق عليكى
ماشى
اة انا مناضلة ثورية جداااازى خالتك فرنسا كدة
ههههههههههه

وبلنسبة للاغنية انا نزلتهالك على مولتى

بلادى بلادى
لكى حبى وفؤداى

البت المشمشية حلوة بس شقية يقول...

david santos
مع انى مش شاطرة فى الانجلش
بس الحمد لله عرفتاترجم اللى كتبتو
اللى هو
انك حبيت البوست
طبعا عشان بتاعى
والحرية لفلسطين
وبعد كدة حاجة كدة معناها لا للارهاب

هو انتا بتفهم عربى وقريت البوست ازاى
نورت وجارى الزيارة لمدونتك

البت المشمشية حلوة بس شقية يقول...

فارس القمر
ياعم وهو انا قولت مالناش دعوة
انا بقول نحارب احنا
ليه والعرب نايمين فى العسل
مينفعش مصر تقوم لو حدها
ماحنا كدة هناخد على دماغنا
لازم كلنا نبقى ايد واحدة عشان نقدر نعمل حاجة

البت المشمشية حلوة بس شقية يقول...

arsenalwy
اة فعلا والله
هما عمالين يشحنو فى مصر عشان يبنو على حسابنا انهم متضامنين
مع القضية الفلسطنية
اول زيارة نورتنى

البت المشمشية حلوة بس شقية يقول...

ذو الوجه المبتسم
انا معاك فى اللى انتا قولتلو
وهو ده هدف اسرائيل تقريبا
انهم يفتحو المعبر
الفلسطنين يجو مصر
يخوشو مصر
اسرائيل طبعا مش هتسبهم
وراهم
دخل الجون فينا احنا

البت المشمشية حلوة بس شقية يقول...

dodda يقول...
how old r u?????

ايه السؤال الغريب ده
هو انا باين عليا عندى 50 ستة
انا ياستى عندى 19 سنة بلا فخر

البت المشمشية حلوة بس شقية يقول...

~*§¦§ Appy §¦§*~
والله يبنتى هو ده اللى بزعق واعلى صوتى عشانو
احنا نعمل اللى علينا
اللى هو ايه
مش اكل ومعونات بس
اناا بردو نكلم
ويعنى السفير الاسرائيلى يتطرد دى مثلا اقل حاجة
نورتى

البت المشمشية حلوة بس شقية يقول...

مقتطفات من حياة فتاة
ايه يابت ايه ياحول الله ولاقوة الا بلله دى
انتى شيفانى اتجننت للدرجادى عشان بكلم فىالسياسة
ومش هتعلقى ليه
ماشى ياختى
نورتى بردو

البت المشمشية حلوة بس شقية يقول...

مقتطفات من حياة فتاة
طيبق اما اشوفك بس

طلاب من أجل مصر يقول...

بجد مدونتك جميله

وبوست رائع

أول مره ادخل مدونتك وان شاء الله مش الاخيرة

البت المشمشية حلوة بس شقية يقول...

عبدالهادى_سارة
ههههههه
ماشى ياعبدة
وشكرا على التعليق الجميل وابقى تعالى تانى

Ehab يقول...

حلو قوي الكلام ده نتكلم بالعقل بتقولي مش عايزه مصر تتسحل تاني في قصة حرب وهي مش حربنا هنمشيها زي ما بتقولي ايوه انا معترف ان الحرب مش لعبه ولا خناقه في الشارع هتنتهي بعد ما اي واحد يضرب التاني وخلصنا دي موت وحرق وخراب وجوع وبلاوي ما يعلم بيها الا ربنا شافوها اجدادنا وابهاتنا في ايامنا اللي فاتت ومعاكي ان كتير من اللي بينادوا بالحرب هم اول ناس هتخلع ساعة الجد لكن المصيبه ان الموضوع كله مكلكع حته صح وحته غلط حرب مش حربنا لا لينا فيها نصيب لأنهم مسلمين زينا وعرب زينا يعني غصب عننا واجبنا نناصرهم في حربهم
وبرده مقدساتهم هي مقدساتنا مسلمين ومسيحين كمان
السلام بتاع السادات كان خطوه ذكيه وافاداتنا في انها وفرت علينا عناء الحرب بس باعت كرامتنا وباعت حاجات كتير وافقنا عليها بأتفاقيه اقل ما يقال عنها انها قذاره وخيانه
اما حروبنا الداخليه والبلاوي اللي احنا فيها واهمية التركيز عليها الأول فدي حضرتك نتيجه لتراكمات كتير قوي ناس مضغوطه وفساد سلطه وظلم لا يفوقه شيء
بالتالي كله مربوط في سلسله واحده
ايه بقى الحل وفين الصح اقولك يا اختي انا معرفش انا بقيت تايه برده كل اللي اقدر اقوله اني اصلح في نفسي لحد ما تجيني فرصه واصلح لبلدي ولبلادنا العربيه كلها
جايز يجي يوم ويبقى ليا فايده

سلاااااااااااااااااااااااام
اخوكي ايهاب

daktara يقول...

بصي يا شيماء
احنا اضعف من اننا نحارب
علي المستوي الشخصي وعلي مستوي الدولة انا معاكي
لكن حتي لو حاربنا ايه اللي هيحصلنا اكتر من اللي احنا فيه ( الحقيقة هو هيحصل , بص ظروفنا دلوقتي صعبة برضة , مقارنة بباقي العالم طبعا)
انت بنفسك قلتي ان البلد في حرب داخلية

daktara يقول...

ده طبعا مش معناه اننا نحارب ولكن يجب ان يكون لنا موقف اقوي حتي لو بالكلام
ولا حتي احنا عجزنا عن الكلام والشجب والتنديد وخلاص وقعة ورقة التوت

انظر حولك
د. خالد عزب

البت المشمشية حلوة بس شقية يقول...

الشنكوتي الكبير
ايه الكلام الكبير ده يا ايهاب
انا معاك فى كل كلمة
وعايزة اقولك ان كلو فعلا مربوط فى بعض
بسلسلة وادة ولحرب دى مش لعبة
يومين وتنتهى فعلا دى سنين وموت
وخراب
مش حاجة سهلة
وربنا يستر علينا من الجاى نورتنى

البت المشمشية حلوة بس شقية يقول...

daktara
أولا يا دكطارة
مين قال انى اسكى شيماء
تانى حاجة
كلامك صح
نحارب الحرب الداخليه والبلاوى اللى عندنا
ونقولى ونصلح بلدنا
لازم نبدا بنفسنا الاؤل

البت المشمشية حلوة بس شقية يقول...

daktara
ولازم موقفنا ده يصلح مننا الاؤل
ونحس ببعض وضميرنا يصحى بقه
نوتنى يادكاطرة

dodda يقول...

الحمد للهنك يا جميله انك 19 سنه
العمر كله ليكى
تتعلمى فيه وكلامك كله حيتغير وفكرك حيحصله انقلاب

شوفتى بقى انه مش سؤال غريب...

البت المشمشية حلوة بس شقية يقول...

dodda
هههههه
ربنا يخليكى واكيد تفكيرى انهاردة مش زى تفكيرى امبارح مش زى بكرة

بس بردو مفهمتش حاجة
هههههههههه

romansy يقول...

لازم نكون قد المسئوليه ونفهم احنا عاوزين ايه
ونبطل الحماس الزايد

ونفكر بعقلنا شويه

البت المشمشية حلوة بس شقية يقول...

romansy
اهم حاجة فعلا اننا نكون اد المسؤولية

روابط يقول...

أسمحى لى يا مشمشية فى اول زيارة لى هنا, ان اقول لك ان معلوماتك السياسية ضحلة بعض الشئ, ونظرية" احنا مالنا " ثبت عدم جدواها من زمن الزمن ....... تحياتى

Unknown يقول...

اللقاء يوم الجمعه 16/1
عدد الجرحى فى الاسماعيلية 19 حالة
بعد ان توفيت شابه هذا الصباح
منهم سيدة تبلغ من العمر 58 عام
وشابة فى العناية المركزة عندها 17 سنة
والباقى رجال من سن 17 عام الى الاربيعنيات
ومازالت المستشفى تستقبل المزيد
محتاجين تبرعات مالية
وبعض الملابس
رقم تلفونى هو 0188047779

*** حور- نور*** يقول...

ولا انا كمان معاهم ولا أعرف البت دى

نداله بقى علشان ان شاء اللة عن قريب لما تتمسكى مش عايزة اشوف وشك تانى
ههههههههههههههههههههه
بوست جميل جدا قدرتى تطلعى اللى جواكى بطريقة حلوة

ربنا معاكى

البت المشمشية حلوة بس شقية يقول...

حازم سويلم
ضحلة يادى الفضايح
انا بتهزا بقه
هههههههههه
اكيد معلوماتى ضحلة
لانى ماليش فى السياسة
دى حاجة دارت فى دماغى وحبيت اكتبها مش اكتر
لان لسانى حالى زى لسان حال باقى الناس اللى مش بتفهم فى الساياة بس بتعبر عن رايها
شكرا
لزيارتك يارب متكونش لزيارة الاخيرة

البت المشمشية حلوة بس شقية يقول...

*** حور- نور***
الله الله على الندالة
اخس عليك يازمن
طب هاتى بقه ال2 جنية اللى عليكى
ماشى اما اشوفك بس
غورى من هنا

نعكشة يقول...

سوري اني مش هقرا كل التعليقات عشان اشوف لو فيه حد قال اللي هقوله فمقولوش عشان مش هضيف جديد عشان هما 77 المهم يعني

انا من رأيي
هوه دة فعلاً اللي زرعوة فينا
انتو مصر
هما بقة فلسطين
التانيين دول الكويت
و الحتة دية موريتانيا

قدروا فعلاً انهم يحسسونا اننا مش كلنا مسلمين
اللي اعرفه ان زمان كان كلنا تحت قائد واحد

اي حاجة تمس شعرة من اي واحد من السند او الهند للمغرب و اسبانيا اي مسلم يتضرب اي جزء يتعرض لإهانة يبقى المسلمين كلهم اتضربوا

اعترف اني فيا شوية من الحتة دية
اني بقول أنا مصرية و بنتمي لمصر
بس مش كلي كدة

المهم يعني دة بالنسبة لكلمة نساعد بس انما ندخل في الحرب ليييييية؟؟؟

بالنسبة بقة لكلمة المقارنة بين اسرائيل او امريكا و مصر

لما زمان في غزوة بدر كان المسلمين تقريبا تلتماية وا لكفار تقريبا 1000 هتقوليلي ماهو الاتنين بيحاربوا بالسيف هقوللك يعني احنا هنحارب بالنبلة و هما هيحاربونا بالصوارييخ

ربنا بيقول إية فيما معناه " و أعدوا لهم- ما استطعتم- من قوة و من رباط الخيل"

يعني اللي تقدروا عليه و الباقي على ربنا
ربنا بيقول إية فيما معناه برضو " إذ تقول للمؤمنين ألن يكفيكم أن يمدكم ربكم بثلاثة آلاف من الملائكة منزلين . بلى إن تصبروا و تتقوا يأتوكم من فورهم هذا يمددكم ربكم بخمسة آلاف من الملائكة مسومين . وما جعله الله إلا بشرى لكم و لتطمئن قلوبكم به و- ما النصر إلا من عند الله العزيز الحكيم-"

الفكرم تكمن في اننا نعمل اللي نقدر عليه و خلاص

Big T O Z للي قصادنا المهم اننا نجمع ما استطعنا
و نؤمن بربنا و النصر كله على ربنا

من امتى كان دم المسلم سهل قوي كدة
انا بقول لنفسي كمان الكلام دة
الموضوع كله من التربية
و الوعي الزائف اللي احنا فيه

يلا خير

المهم انا اللي نفسي فيه بجد
يعني هيا مش حاجة قصدي بيها أي حاجة والله

بس نفسي حد يشجعني و نروح هناك
لإن نفسي ضعيفة صراحة
انا مش كويسة
لإني عارفة ومش قادرة انفذ

بس باذن الله هحاول

ربنا يسهل

المهم يعني

حبة بس عشان الأمن القومي :D

ربنا يخليلنا بابا حسني :]

و تحيا مصر

سلام عليكِ

:D

البت المشمشية حلوة بس شقية يقول...

نعكشة
نعكوشة المنكوشة
اولا عايزة اقولك حاجة مهمة
انتى ليه قافلة الكومنتات على اى بوست عندك
مش بعرف ادخل اعلق عندك

هههههههه
ايه يابت الكلام ده كلو
مالكيش دعوة بتعليقات حد
انتى تعليقك غير اى حد

وبعد الكلام الكتير اللى كبتيه ده
عايزة اقولك نا اكمان نفسى نبقى ايد واحدة
زمان كنا بنقول احنا مسلمين
لاكن دلوقتى
مصر وسورا ولبنان000000
عشان كدة مش هنبقى حاجة
الا لما نتوحد
تحيا مصر ياستى وربنا يخلى عمو حسنى ولا تزعلى

حفيدة عرابى يقول...

انا كنت ناوية اعلق على البوست بتاعك لكن لقيت ناس كتير قلت نفس افكارى فقلت مفيش داعى للتكرار بس بصراحة بعد التحية والسلام عندى شوية حاجات عايزة اقولهم اولا انت طالبة يعنى لسه صغيرة وللاسف ماتزعليش منى اتشكل وعيك على تليفزيون صفوت الشريف والريادة ومصر التى تضحى من اجل القضية الفلسطينية انا ياستى بلا فخر مدرسة تاريخ وبقولك بصوت عالى ده كله كلام فاضى مصر حاربت اسرائيل 4مرات علشان مصلحتها ومنها القومى اللى بالصدفة فلسطين جزء منه ومش قادرة اشرح اكتر من كده لانى لسه راجعة من الشغل وتعبانة ثانيا انت حاطة بانر جميل الا رسول الله --تفتكرنى الرسول عليه الصلاة والسلام كان هيوافق على رأيك ده يعنى ما قريش مكنش فى مقارنة بين قوتها وقوته ومع ذلك وقف قصادها فى بدر وأحد والاحزاب وبعدين راح عليه الصلاة والسلام لغاية عندها وفتح مكة ومش كده وبس فتحنا بلاد فارس والشام ومصر وشمال افريقيا وباكستان و.-----الخ النصر من عند الله وبعدين مش الرسول عليه الصلاة والسلام قال انصر اخاك ظالما او مظلوما فين ده مع غزة الان ثالثا مين قال ان اسرائيل مرعبة اوى كده انا مش بقلل من قيمة عدوى بس فعلا كده تبقى اسرائيل نجحت فى حربها النفسية علينا لما نقول الكلام ده لبعض ربنا سبحانه وتعالى قال فيما معناه انهم يألمون كما تألمون ويرجون من الله مالا ترجون ---انا اسفة على لاطالة بس والله انا كده مختصرة جدا تحياتى ليكى

البت المشمشية حلوة بس شقية يقول...

لقد خلقنا الله احرارا
صدقينى انا معاكى فى كل اللى بتقوليه ده وفهماكى
وانصر اخاك ظالما او مظلوما طبعا
بس انا بكلم دلوقتى على عقل ومنطق بعيد عن الدين
وصدقينى انا مش تافهة ولا ساذجة زى مانتى فاكرة بس انا بحاول على اد ماقدر اطلع احساس كان جوايا وافكار مشوشة واعرضها عليكو مش اكتر
نورتى ياستى وان اكان نفى اطلع مدرسة تايخ عشان انا شاطرة فيه بس قلبت معايا وبقيت عربى

حفيدة عرابى يقول...

انا مقصدش والله انك تافهة او ساذجة لاسمح الله بس كلنا اتربينا على تليفزيون صفوت الشريف ده بس انا حظى ان دراستى فهمتنى حاجات كتبر كانت غايبة عنى وبالنسبة لكلامك اسمح لى انا ماتكلمتش فى النقطة دى لانى حسيت ان فى ناس تانية علقت عليها لكن محدش فعلا طلب من مصر تحارب ولو ربنا كرمنا وحاربنا الصورة مش هتكون سيئة كده لانى مقتنعة جدا بكلام نزار قبانى لم يدخل اليهود من حدودنا وانما تسربوا كالنمل من عيوبنا -هزيمة اسرائيل وامريكا هينة والله بس نعرف ربنا بس

البت المشمشية حلوة بس شقية يقول...

لقد خلقنا الله احرارا
ياستى انتى اختى الكبيرة
وانا اكيد بتعلم وبفهم منك حاجة غايبه عنى
ربنا يسعدك ييارب
وياريت متكونش دى اخر زيارة ليكى هنا
نورتينى

تامر علي يقول...

هناك فرق كبير بين الا ندخل الحرب وأن نقوم بحصار اخواننا بالاشتراك مع اليهود ونغلق عليهم باب الحياه .... هناك فرق بين ان نقرر الا نحارب وبين أن نقررالا ندعم مسلم ونتركه يموت ونحن نتفرج عليه ... فرق كبير بين أن أكون (شريك) ومؤيد للعدو وأن أكون محتقراً للعلماء أرفض مقابلتهم في وقت أقابل فيه الأعداء الحقيقين واسلم عليهم واخدهم بالحضن .... هل قرأت اتفاقية السلام ؟؟؟؟؟؟ لو قرأتها لعرفت أن اسرائيل حصلت بها على ماكان يستحيل أن تحصل عليه لو انتصرت في 73 ... حق في بترول ... حق في تطبيع ... حق ممارسة التجارة والمرور في قناتنا بلا قدرة منا على اتخاذ أي موقف في حالة نقضهم هم انفسهم كل الاتفاقيات التي نقضوها بالفعل ولازلنا نتمسك بها حتى الان ... فروق كبيره وواضحه .